Verval ye’l nome artísticu de Carlos Díaz Sánchez. Téunicu de soníu, teclista, guitarrista, bouzoukista y con formación n’instrumentos tradicionales como la gaita asturiana y dellos instrumentos de percusión, Carlos ye’l nucleu de la composición en Xera.
Les sos principales fontes d’inspiración nun entamu sintonizaben con músicos como Vangelis y Jean Michel Jarre, pero darréu vióse influyíu poles nueves corrientes de la música electrónica a entamos de los años 90 (Depeche Mode, Nine Inch Nine, Björk, etc). Más tarde, Carlos entró en contautu col mundu de la música folk asturiana y entamó a interesase por nuevos sones. Ye entós cuando conoz el trabayu de Martyn Bennett y Paul Mounsey. Dende l’añu 2000, Carlos escomenzó a investigar la posibilidá de fusionar el soníu electrónicu y el tradicional con un calter industrial y a la vegada sinfónicu. Sedría en 2003, de la mano de Flavia, cuando compondría’l primer tema musical, “Ñubes”, col qu’afitaría les bases de lo que diba ser la música de Xera.

Flavia ye’l nome artísticu d’Iria Rodríguez Álvarez, conocida tamién como Iria Flavia. Vigulinera, zanfonista y rabelista, Flavia constitúi la segunda llinia de composición, arreglos y producción en Xera.
Les sos fontes d’inspiración surden del orixe de la escena independiente de la música electrónica de los 90, con artistes como Björk o Garbage, y mézclense con corrientes clásiques contemporánees como Philip Glass. Flavia entra en contautu cola escena folk nel añu 2002 y vese influyía polos trabayos de Martyn Bennett y Hedningarna. De magar entós, empobinó gran parte del so tiempu a investigar nueves formes d’esplotar tanto’l vigulín como la zanfona y el rabel, asina como a les posibilidaes de puesta n’escena d’instrumentos antiguos col usu del looper, por exemplu.